Triunfo da esperança sobre o medo

PorEurídice Monteiro,29 mar 2021 7:19

Undi és ta leba ódiu, nu ta leba alegria; undi és ta spadja medu, nós nu ta fazi brota speransa na korason di tudu kriolu pa tudu kantu di Cabo Verde y na terra lonji.

Na fomi di 1955, nha familia tevi nesesidadi di sai di país, ba São Tomé. Nha MÃE nasi 22 di agostu di 1961 na «Roça Boa Entrada» na São Tomé.

Kaminhu lonji.

Era un emigrason forsadu.

Nós tudu nu obi ta papiadu na emigrason pa São Tomé, pa undi bai más de 80.000 kabu-verdianus por kausa di seka y fomi na Cabo Verde. Guentis ka tinha nenhum tipu di apoiu di Stadu, nem kumida, nem agu pa bebi. Só ba São Tomé ki era ramedi.

Nha avó ta fla-ba ma, pa ultrapasa fomi, es sufri kaladu. Trabadja dentu txuba di palmanhan pa noti na plantason di kakau. Es sufri txeu. Es dexa familia na terra ki mori, ki nunka más es ka odja...

Txeu familias di kabu-verdianus fika na São Tomé pa dia di oji. Di meu regresa na anu ki nha mãe nasi. Kandu es regresa pa Calheta, es kontra ku un grandi surto/endemia di malária/paludismo ki ta atingiba prinsipalmenti interior di Santiago.

Nha PAI nasi 26 di julhu di 1959. Kandu nha pai tinha 9 anu di idadi, es muda pa Calheta. Si pai, nha avô, mandadu pa «brigada de endemias» pa ba kombati malária na freguesia di São Miguel Arcanjo pa ka mori más alguen di ki kel ki sta ta moreba. Nha avô muda pa Calheta ku nha avó, si mudjer, y ses 3 fidjus ki nasi na Somada. Di Calheta era más fasil desloka pa kes zonas di grandi propagason di malária.

N kria ta obi ta papiadu na endemias, DDT, y fomi na Cabo Verde. Fomi é kuza más tristi ki dja kontisi li na nós terra. Só na fomi di 47, só li na Santiago, nu perdi más di 65% di populason.

Povu di Cabo Verde, anós, dja nu nfrenta txeu kalamidadi, txeu sofrimentu, dja nu sufri na peli tudu tipu dor. Na kel bes, tenba ausensia di guvernu. Oji, grasas a Deus, nu ten guvernu pa kudi-nu pa nunka más es tipu kuza li ka kontisi na nós terra.

Cabo Verde nfrenta pandemia di coronavírus di kabesa erguidu. Nu pasa dificuldadi, ma ka por falta di guvernu. Sondagens di entidadi rekonhesidu ta mostra ma 91% di kabu-verdianus ta konkorda ku medidas adoptadus pa guvernu na geston di pandemia.

Na pandemia, 18.195 trabadjadoris foi abrangidu pa lay off y resebi di Previdência Social 35% di valor di saláriu; 2.947 resebi subsídiu desempregu; 2.212 resebi subsídiu di isolamentu profilákticu. Na totalidadi, 41% di seguradus resebi pelu menus un prestason di Providência Social.

Gosi ki tormenta dja pasa, vasina dja txiga, es ta ben fla ma és ki ta ben salva pátria?

Na nha rubera, nu ta fla ma é na hora di fronta, na hora di sofrimentu, ki nu ta sabi kenha é kenha. Kandu pandemia toma Cabo Verde, ku kenha ki nu konta? Kenha ki nu odja ta rabida mundu pa ponta pa atxa soluson pa Cabo Verde?

Alguen ki nunka kati-kati na vida, ki ka konxi difikuldadi, ki ka sabi lida ku difikuldadi, ta ben fla ma el ki é salvason da pátria? Ten kuza ki ka ta kola.

image

Alguen ki nasi bonbudu y kontinua bonbudu, ta ben fla ma é kre un «Cabo Verde para todos». Nhas guentis, kel slogan polulista li go ka pega, pamodi ninguém ka ta kunfia nes. Ninguém ka ta akretida na kuze kes ta tra di ses boka. Ninguém ka ta xinti na fundu korason ma és meresi teni Cabo Verde na ses mó, ses baxu.

Undi és ta leba ódiu, nu ta leba alegria; undi és ta spadja medu, nós nu ta fazi brota speransa na korason di tudu kriolu pa tudu kantu di Cabo Verde y na terra lonji. Nu sta ben fazi un kanpanha ku positividadi, ku amor na korason, ku fé y speransa. Tudu ten soluson!

Sima nós povu ta fla: kaminhu klaru ka mesti kanderu. Nes eleison, di dia 18 di abril, nu ten só un kaminhu ki é seguru, ki ta kontinua na rumu di desenvolvimentu.

Cabo Verde sta na kaminhu seguru.

Si nu kre odja Cabo Verde ta kresi, na LIBERDADE, dja nu sabi...

Texto originalmente publicado na edição impressa do Expresso das Ilhas nº 1008 de 24 de Março de 2021. 

Concorda? Discorda? Dê-nos a sua opinião. Comente ou partilhe este artigo.

Autoria:Eurídice Monteiro,29 mar 2021 7:19

Editado porAndre Amaral  em  15 abr 2021 8:19

pub.
pub.
pub.
pub.

Últimas no site

    Últimas na secção

      Populares na secção

        Populares no site

          pub.